થાયે આશ નિરાશ ન મારી !
કોમળ છે અત્યંત ખરે એ,
કરમાયે ના ન્યારી ... થાયે.
ટકે તમારા આધારે એ,
શરણ લઈને ભારી;
પોષણ પામે વધે નિરંતર
ધ્યાન તમારું ધારી ... થાયે.
ભાવકુસુમથી ભરચક છે એ,
સુવાસ છોડે સારી;
તનમનઅંતરમાં રસ રેલે,
પ્રીત તમારી પાળી ... થાયે.
મહિમાનાં મધુ ગીતો ગાયે,
જાય કદી ના હારી;
જન્મી ત્યાંથી ગઈ ખરેખર
તમારા ઉપર વારી ... થાયે.
પોતાની જાણીને તેને
લેજો આખર તારી;
‘પાગલ’ કહે થઈ છે શોકિત,
લેજો આજ ઉગારી ... થાયે.
- © શ્રી યોગેશ્વરજી