શાંત ચિત્ત કરી, કરી લો તો વિચાર જરી,
લાગશે મારી તમોને વાત છેક ખરી;
આરઝૂ મારી તમે સમજી જશો સઘળી,
શાંત ચિત્ત કરી, કરી લો તો વિચાર જરી.
વધારે પડતી નથી કૈં માગણી મારી,
જણાશે તમને; સમજશો ને દશા સારી;
બહુ વખતથી વાત છે મેં કેમ એક કરી,
શાંત ચિત્ત કરી, કરી લો તો વિચાર જરી.
માગવા જેવું તમારા વિણ ખરેખર શું?
ચાહવા જેવું તમારા વિણ નથી જ કશું;
એટલે ચાહું તમારી સાથ છેક વસું,
પ્રાર્થતો તમને સહીને કષ્ટ કાલ હસું.
કહે ‘પાગલ’ રહો તેથી પ્રેમસાથ મળી,
તરું કે અંધાર, જાયે પ્રાણ છેક ફરી;
અતિશયોક્તિ છે નહીં આમાં કશીય કરી;
શાંત ચિત્ત કરી, કરી લો તો વિચાર જરી.
- © શ્રી યોગેશ્વરજી