શાંત રાતે રાતરાણી મઘમઘે જ્યારે,
બધું યે નિસ્તબ્ધ થાયે ને સુએ ત્યારે,
તારલા ને ચંદ્રની એકાંત સાક્ષીમાં,
મિલન મંગલ આપણું હો આજ રાત્રીમાં !
મધુર ને શીતળ પવન પ્રસરી રહે સઘળે,
દેવદૂત સમો; થઈ યોગી સમાધિ ધરે;
અન્ય કો’ દેખાય ના જાગ્રત વનેપુરમાં,
મિલન મધુરું આપણું હો આજ રાત્રીમાં.
વસ્યું ગંગા તેમ જમના મધ્યમાં સ્થળ આ,
પર્વતો સોહી રહ્યા, વનની અનન્ય છટા;
કરી સંગમ આપણાં ઉરનો પવિત્ર મહા,
મિલન મંગલ આપણું હો આજ રાત્રીમાં.
મૂક લીલા થાય ને છો ગુપ્ત થાય કથા,
શાંતિ વરસે ને ભલે શમતી બધીય વ્યથા;
દેવ વરસે પુષ્પ, મંગલ પ્રકૃતિ સાક્ષીમાં,
મિલન મધુરું આપણું હો આજ રાત્રીમાં.
છે અશાંત સમગ્ર જગ ભુલ્યું તમોને આ,
બની શાંતિ પ્રકાશ ત્યારે પ્રકટ થાઓ, મા !
થાય મંગલ વિશ્વનું, ‘પાગલ’ હરે જડતા,
મિલન મંગલ આપણું હો, દૂર હો પડદા !
- © શ્રી યોગેશ્વરજી