શુક્રવારની રાત આજ
તો શુક્રવારની રાત.
આજે કોલ મિલનનો આપ્યો
ફરીથી તમે માત !
અવશ્ય આવો આજ રાતનું
કરવા પુનિત પ્રભાત.
શુક્રવારની રાત આજ
તો શુક્રવારની રાત.
અંતરમાં આનંદ અનેરો,
કેમ કરાયે વાત;
વાત કરીએ મળો તમે તો,
ઉજ્જવલ થાયે જાત.
શુક્રવારની રાત આજ
તો શુક્રવારની રાત.
‘પાગલ’ પ્યાસી તલસે તમને
આતુર આંખે માત!
પાઈ પ્રેમપિયૂષ કરી દો
સફળ આજની રાત !
શુક્રવારની રાત આજ
તો શુક્રવારની રાત.
- © શ્રી યોગેશ્વરજી