સૌથી શું સારું ? કહોને, સૌથી શું સારું ?
સ્વર્ગતણા ગુણ ઘણા ગવાયે, એ છે રઢિયાળું;
મોજશોખનો પાર ન એમાં, સુખ એમાં ન્યારું. ..સૌથી શું.
ઘડપણ એમાં નહીં, રોગ ના, બંધનનું તાળું;
ચિંતા કોઈ રહે નહીં ત્યાં, દુઃખ જ ક્યાં વારૂ ? ..સૌથી શું.
મોક્ષ વળી છે ઉત્તમ માન્યો, જ્ઞાનીને ચારું;
બીજા કૈંક કહ્યા છે લોકો, આ વિશ્વે ચારું; ..સૌથી શું.
બોલ્યાં બાળક એ સાંભળતા, આજ જગત સારું;
સ્વર્ગ સમાયું એમાં, તેમજ મોક્ષ મળે ચારું. ..સૌથી શું.
દુઃખદર્દને દૂર કરીને, જગત કરો ન્યારું;
ઈશ્વર પણ અવતાર અહીં લે, આજ જગત સારું. ..સૌથી શું.
- શ્રી યોગેશ્વરજી