સાચો સંત કહાઉં કેમ?
સંત નામને યોગ્ય બનું શેં,
ભક્તન થાઊં કેમ ? ... સાચો.
વરસી ચૂકી હજી તમારી
મારા પર ના રે’મ;
મધુર કરી ના દૃષ્ટિ મુજ પર,
પ્રકટ કર્યો ના પ્રેમ ! ... સાચો.
ફોરમ વિના ફૂલ ને દીપક
જ્યોત વિનાનો જેમ;
નીર વિના નીરસ છે સરિતા,
અંગ આંખ વિણ તેમ. ... સાચો.
તમારા વિના જીવન નીરસ
લાગે મુજને એમ;
કેમ ફરું સાનંદ નિભાવ્યો
જ્યાં લગ ના છે નેમ ! ... સાચો.
તમે મળી જાઓ તો મારો
કરું સમર્પિત પ્રેમ;
ગૌરવથી મસ્તક મંડિત હો,
હરખું, માનું ક્ષેમ. ... સાચો.
‘પાગલ’ કહે ફરું છું આજે
અનાથ બાલક જેમ;
ઓથ દઈ દો મને તમારી,
સુગંધમય હો હેમ. ... સાચો.
- © શ્રી યોગેશ્વરજી